Hoxe chega ao seu fin este estraño e anómalo curso escolar que, sen dúbida, non esqueceremos por moitas razóns. Un curso no que a necesidade levou a impoñer a distancia e os recursos tecnolóxicos substituíron aos mestres/as, aos xogos de patio e ao traballo colectivo na aula.
É certo que na vida todo é aprendizaxe e, ás veces, estas situacións nos axudan a medrar e a valorar todo o que temos na nosa vida cotiá.
Ben seguro que todos/as sentimos morriña lembrando os bos momentos da escola: a emoción de ver aos compañeiros/as e compartir con eles/as risos e enredos, a compaña dos mestres coas súas explicacións e palabras de alento, o ulido deses cadernos repletos de tinta e lapis... Tantas vivencias e recordos que se quedarán gardados para sempre na nosa memoria.
Dende o Mupega desexamos a todos os estudantes unhas felices vacacións, agardamos que recorden o fermoso de ir á escola e volten con enerxías renovadas o seguinte curso.
