No ano 2019 cúmprense 100 anos do nacemento de Alejandro Campos Finisterre máis coñecido como Alexandre Fisterra o inventor do futbolín. Porén, no Mupega queremos homenaxear a súa figura expoñendo o futbolín como peza destacada na planta baixa do museo.
Baixo a invención deste xogo, agóchase unha fermosa historia.
Na planta baixa do museo ocupando un lugar sinalado na entrada do mesmo, poderemos ver estes días un modelo do coñecido xogo denominado popularmente como o futbolín.
Xunto coa peza, elaborada en Portugal na segunda metade do s.XX, poderemos ver unha presentación sobre a historia da mesma e do seu inventor, o galego Alexandre Fisterra.
Coa exposición do futbolín como peza destacada pretendemos lembrar a este galego, que tamén foi editor e poeta, no centenario do seu nacemento.
Se queredes coñecer máis sobre esta peza non dubidedes visitarnos.
Esta mañá recibimos a visita dun grupo de estudantes do ciclo de Educación Infantil do CIFP Ánxel Casal. Os alumnos/as realizaron unha visita guiada na que coñeceron as nosas aulas históricas, o mundo infantil e os xoguetes e diversas pezas de material educativo. Tamén volveron a ser nenos/as por un intre na nosa aula obradoiro. Agardamos vervos novamente!
Os alumnos de 4º de grao de Educación Infantil realizaron unha visita guiada polas instalación do museo. Visitaron a nosa exposición permanente para coñecer de primeira man a evolución da educación na nosa comunidade. Foi un grupo estupendo que participou en todo momento. Dende o Mupega esperamos ter contribuído aos vosos aprendizaxes na vosa formación de mestres.
Onte no museo, recibimos a visita de todas as alumnas do CEIP Pazos Comoxo de Boiro. Eran pouquiñas pero unhas nenas moi participativas e con moitas ganas de aprender. Mesmo se atreveron a escribir coa pizarra e o pizarrillo e iso que algunha aínda non cumprira os tres aniños. Foi unha visita do máis divertida así que esperamos voltar a vervos polo museo novamente.
O obradoiro será realizado pola Sociedade Cooperativa Galega Miudiño. Poderán participar nenos/as a partir dos 4 anos de idade. Todos aqueles nenos/as de idades comprendidas entre 4 e 9 anos anos deberán estar obrigatoriamente acompañados dun adulto durante a realización do obradoiro. No caso nenos/as a partir dos 10 anos o acompañamento na actividade será opcional.
Para inscribirse será necesario enviar un correo electrónico á dirección: museo.pedagoxico.galicia@edu.xunta.gal, co nome do neno/a e a súa data de nacemento, teléfono de contacto e nome do adulto acompañente (de ser o caso).
Non perdades a ocasión de pasar un bo intre connosco!
Hoxe viñeron a coñecernos estudantes de 1º de grao de Educación Primaria procedentes da facultade de Vigo. Percorremos con eles/as as tres plantas do museo facendo especial fincapé na evolución da educación a través das nosas aulas históricas. Foi unha visita estupenda con un grupo moi interesado. Agardamos velos de novo e esperamos ter axudado na súa formación a estes futuros mestres.
Esta mañá recibimos a visita do alumnado de 4º, 5º e 6º do CEIP de Curtis. Os nenos/as aprenderon sobre os materiais que se empregaban antigamente na escola e sobre os xoguetes que facían os cativos. Desfrutaron moito na nosa aula obradoiro e algúns prometeron voltar coas súas familias. Esperamos vervos novamente rapaces!
O pasado venres celebramos no Mupega un obradoiro didáctico de Samaín para vinte nenos e nenas de diferentes idades. No obradoiro aprendemos un chisco sobre as orixes do Samaín para despois realizar unha actividade plástica: a elaboración dun monstro personalizado. Como non podía ser doutro xeito, pasámolo de medo!
Dende Pazos de Borbén viñeron hoxe a visitarnos os alumnos/as do CPI Curros Enríquez. Na súa visita á exposición temporal descubriron aspectos descoñecidos para eles sobre a educación dos seus avós, fixeron un percorrido polas nosas aulas históricas e sorprendéronse cos xogos e xoguetes populares. A única mágoa foi o pouco tempo do que dispoñían na visita. Esperamos vervos novamente rapaces!