Peche temporal do Mupega ao público pola pandemia de COVID-19
En aplicación do Acordo do Consello da Xunta de Galicia, de data 12 de marzo de 2020, polo que se adoptan medidas preventivas en materia de saúde pública na Comunidade Autónoma de Galicia, como consecuencia da evolución da pandemia de coronavirus COVID-19, queda suspendida a apertura ao público deste centro.
A máquina Perkins de escritura en Braille.
Esta peza, que habitualmente está exposta no corredor adicado á Educación Especial, é unha doazón do CRE Santiago Apóstol de Pontevedra. É da segunda metade do século XX e está feita en ferro cromado.
A máquina costa dos seguintes elementos: seis teclas (unha para cada punto Braille), conectadas a seis punzóns que poden ser pulsadas á vez, unha tecla para separar as palabras, tecla de cambio de liña e outra de retroceso. Consta á súa vez dun timbre que se acciona cando quedan sete caracteres para chegar ao marze dereito.
Obras completas Concepción Arenal (tomos II e XIV)
Nestes dous tomos da publicación da Obra Completa de Concepción Arenal da segunda metade do S.XIX a autora realiza un estudo minucioso da situación dos presos nos centros penitenciarios realizando unha denuncia sobre as precarias condicións nas que vivían os presos.
Asemade, ao longo destas dúas obras literarias, Concepción Arenal establece unha serie de reformas necesarias para favorecer a situación dos reclusos e o tratamento que estes recibían.
Nova "peza destacada" no Museo Pedagóxico de Galicia
Ás portas da celebración do Día Internacional da Muller, o Mupega adica a súa nova peza destacada a Concepción Arenal, todo un referente en feminismo, progresismo e educación.
Nestes dous tomos da súa obra completa, Concepción Arenal realiza un amplo estudo sobre a situación dos centros penitenciarios da época e reflexiona sobre as modificacións necesarias para os mesmos e para a sociedade.
Unha das súas citas máis célebres foi "Abride escolas e pecharanse cárceres" poñendo de manifesto o valor da educación para o desenvolvemento persoal e social das persoas.
A súa loita pola igualdade de dereitos para as mulleres, as súas obras literarias e as súas aportacións a nivel educativo convirten a Concepción Arenal en todo un referente que non podíamos esquecer nestas datas sinaladas, máis aínda cando neste 2020 se cumpre o bicentenario do seu nacemento.
Visitas no Museo Pedagóxico de Galicia
Onte tivemos un día do máis completo no Museo Pedagóxico de Galicia. Primeiramente recibimos ao alumnado de infantil do CEIP O Coto (Negreira) que veu a coñecer a nosa exposición temporal. Posteriormente alumnos de 1º e 2º do CEIP Alexadre Díaz Cardaso (Noia) viñeron visitar a exposición permanente e rematamos cos nenos/as do CEIP Escarabote (Boiro) que tamén se decataron pola mesma exposición.
Foi un inmenso pracer recibilos a todos/as e desexamos telos aquí novamente!
Obradoiro 6 do marzo no Mupega
Neste mes de marzo con motivo da celebración do día da muller propoñemos a realización dun obradoiro de ilustración denominado "Contos clásicos para a igualdade". O obradoiro correrá a cargo do recoñecido ilustrador Yago García quen analizará cos asistentes diversos contos clásicos para logo redeseñar aos personaxes evitando estereotipos de xénero.
O obradoiro realizarase o 6 de marzo de 2020 de 17:00 a 18:30 e contamos con 25 prazas para nenos/as de 7 a 12 anos de idade.
Para inscribirse cómpre encher o seguinte formulario ou enviar un correo electrónico a: museo.pedagoxico.galicia@edu.xunta.gal indicando o nome do neno/a, idade e teléfono de contacto. A inscrición debe ser realiza polo pai/nai ou titor legal.
Agardámosvos.
Obradoiro de Entroido no Mupega
No Mupega xa comezamos a festexar o Entroido e que mellor forma de facelo que achegando ao noso museo unha tradición típica do Entroido galego, o día e comadres e compadres. Comezamos explicandolle aos pequenos/as algunhas características do Entroido tradicional en Galicia para logo afondar na celebración desta tradición tan nosa. Non podíamos rematar sen poñer en práctica todo o aprendido polo que cada neno/a elaborou o seu compadre ou a súa comadre empregando diversos materiais.
Foi unha tarde do máis entretida.
Visitas de grupos escolares de Educación Primaria no Mupega.
Alumnos/as de 6º do CEIP López Ferreiro e de dous grupos de 3º a 6º de Educación Primaria do CPR Artai visitaron o noso museo para poder coñecer un chisco da historia da nosa educación. Todos eles amosaron interese en coñecer os antigos materiais empregados na ensinanza, os xoguetes e os segredos que gardan as escolas chegadas alén mar. Foi un pracer telos connosco e agardamos que volvan cando o desexen.